انتى ليه مستنياه يقدرك ويحسسك بقيمتك وحلاوتك واختلافك؟ ليه متخيلة أنه هو قادر على أنه يزود لك ثقتك بنفسك واستحقاقيتك؟ ليه فاكرة إن الراجل يعرف يوريكى حاجات حلوة إنتى نفسك مش عارفة تشوفيها بنفسك؟ لازم تبقى عارفة ان الراجل اللى انتى متجوزاه اتربى نفس التربية اللى اخوكى اترباها...أو نقدر نقول نفس التربية اللى انتى اتربيتيها. التربية بتاعت: لازم....علشان. لازم تطلع الاول وتجيب مجموع اكبر من مجموع ابن خالك عشان أتفشخر بيك و تنول الرضا. لازم تسمع كلام ابوك عشان هو عارف مصلحتك اكتر منك. لازم ماتعيطش عشان انت راجل والرجالة مابتعيطش. لازم ماتوسخش هدومك وماتعملش كذا ولا كذا عمو يقول عليك ايه، الناس يقولوا علينا ايه. ليه متوقعة من راجل ما أخدش غير حب مشروط مقنن، ماحسش بالقبول عمره، ولا اتربى يفهم نفسه ويحترم مشاعره ويعبر عنها، أنه يديكى ثقة فى نفسك و يحبك فى كل حالاتك ويقبلك وانتى منكدة ويفهمك ويحترم مشاعرك؟ أصل منين؟ هو عرف ده فين؟ جربه امتى؟ ولا مارسه أو خده مع ومن مين؟ اسالى اى ست لقت دعم هتقولك احنا بناخد الدعم من نفسنا، او من الستات اللى زينا من اخواتنا وأمهاتنا وصاحباتنا، من الطبيب والمعالج النفسى، هما دول اللى عارفين معنى دعم وقبول وحب غير مشروط وعناية ورعاية واهتمام. مش عشان اتربوا عليه..لكن عشان الست مخلوقة دائما وعندها رغبة فى فهم نفسها وتحليل المشاعر والغوص جوا كل موقف عشان تعرف ليه وازاى، الست بتقرأ أكتر، بتزور معالج نفسى أكتر، بتسأل وتدور وتطلب مساعدة أكتر. لكن الراجل الشرقى اتربى إنه عيب مايبقاش عارق، عيب يسأل أو يحاول يقف شوية مع نفسه يفهم، عيب اصلًا يعترف حتى لنفسه أن فيه مشكلة، هو اتربى كده، وجود مشكلة فى علاقتكم أو عندك، معناه أنه هو نفسه عنده خلل، فكرة أنا محتاجة منك احتياج عاطفى معين بيستقبلها إنه مقصر، فكرة تعالى نروح لحد يساعدنا بيستقبلها انتقاص من شأنه. إلا من رحم ربى. فالأسهل عليه إنه تطلعى انتى اللى نكدية وطلباتك اوڤر وبتكلكعيها وخليكى ماشية ورا الدكاترة النفسيين اللى هيعلموكى تحترمى حقوقك وتطالبى الآخرين أنهم يحترموها وتتعلمى تقولى لأ، وتبطلى تعيشى للآخرين وتيجى على نفسك. . مش الهدف من الكلام هنا نهاجم الرجالة، أبسوليوتلى عزيزى القارئ، فلو انت عزيزى الرجل اللى بتقرأ البوست وابتديت تتحمق ابقى قول لنفسك أن انت من النادرين دول اللى هى لاكى تو هاڤ يو. طبعًا فيه رجالة اتربت بطريقة سوية، آه نادر بس موجود وربنا بيحبك لو قابلتيه. لكن الهدف من الكلام اننا ننزل بسقف توقعاتنا شوية، ونبطل نحط أمل كبير فى فكرة يدينى ثقة فى نفسى ويحسسنى بقيمتى و يدعمنى ويقبل مشاعرنى. أنتى اعرفى قيمتك وادى نفسك حقها وقدرها، واتعلمى تحمى حدودك وتعرفى مشاعرك وتعبرى عنها برحمة وحب، واتعلمى تطلبى الدعم من الأشخاص اللى التجربة أثبتتلك أن هما دول اللى بيقدموه ليكى، واتعلمى تعلمى اولادك قبل بناتك كل ماسبق.وبطلى تسنينة
