مريم حاليا عندها سنتين وأربع شهور ، السنة اللي فاتت في شهر ٢ بدأت تعيط أكتر من الطبيعي أهلها راحوا بيها لأكتر من ٢٠ دكتور ومحدش عارف عندها ايه والعياط مستمر لأكتر من ٥٥ يوم وبعدها رجليها وقفت تماما عن الحركة واكتشفوا إن عندها ورم ضاغط على النخاع الشوكي مسببلها شلل ، كان لازم تعمل عمليه فورا لاستئصال الورم ده وبدأت بعدها رحله الكيماوي ، بعد ١٣ جرعه كيماوي فضل حجم الورم الباقي زي ماهو وهي طبعا في عذاب طول فتره العلاج ، خلصت مريم الجرعات وفيه دكاترة قالوا ضروري تاخد إشعاع ودكاترة تانيين قالوا مينفعش لاقدر الله ممكن تموت لو خدته ، باباها بيقول "بعد ماصليت استخاره قررت مأديهاش إشعاع واكتفينا بالمتابعات كل ٣ شهور وطبعا كل دقيقه بتمر علينا بتمر بقلق وخوف من اللي ممكن يحصل" ده غير إن البورت اللي مركباه في صدرها سببلها ميكروب اتحجزت بسببه في المستشفى ١٤ يوم على المحاليل .. وبعد ما خدت ٢٠ جلسة كيماوي تانية للأسف نتيجة رسم العصب وآشعات كتير ظهر إن الورم كبر والكيماوي مش مأثر فيه ومش عارفين يسيطروا عليه والدكاترة أجمعوا إن مريم تاخد كورتيزون بحيث إن الورم مايكبرش تاني ويضغط على النخاع والمثانه وإنها في المستشفى بتاخد علاج على الفاضي ومش جايب نتيجه ده غير إن العملية خطر عليها وكمان مش مضمون إزالته فَخرجوها وكتبولها كورتيزون ومسكنات في البيت لكن مريم حاليا مش بتقدر تاخد المسكنات ولا حتى المضادات ومش بتنام ربع ساعه على بعضها وبتصحى تعيط من الألم .. باباها قدر يجمع التقارير من أول تعبها لحد دلوقتي من المستشفى ومحتاج استشاره من دكاترة خارج مصر فياريت اللي يقدر يساعده ويسأل في مستشفيات بره هيكون شاكر ليه جدا واللي ميقدرش ياريت يساهم إن قصة مريم تنتشر لعل وعسى نكون سبب في علاجها ونلاقي ده في ميزان حسناتنا يوم القيامة، لعلها المُنجية ..

أفضل مستشفيات لعلاج السرطان في العالم موجودة في : أمريكا - فرنسا - ألمانيا - الصين ..

ومن أحياها فكأنما أحيا الناس جميعا

اعتبروها بنتكم ربنا يشفيكي يا مريومة يا حبيبتي وتفرحي قلب بابا وماما ويشوفوكي بتجري وتلعبي

• تعليقات الفيس بوك
• تعليقات الموقع